काठमाडौँ।
राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानबहादुर (ज्ञानेन्द्र) शाहीले मुलुकको वर्तमान प्रदेश संरचना खारेज गर्नका लागि सरकारलाई आवश्यक पर्ने दुई तिहाई बहुमत जुटाउन आफ्नो पार्टीले पूर्ण समर्थन गर्ने प्रतिबद्धता व्यक्त गर्नुभएको छ।
सोमबार राजधानी काठमाडौँमा आयोजित पार्टीको एक विशेष कार्यक्रमलाई सम्बोधन गर्दै नेता शाहीले देशको आर्थिक भार र संरचनागत जटिलता हटाउन प्रदेश तहको खारेजी अनिवार्य रहेको औँल्याउनुभयो। उहाँले वर्तमान सत्ता गठबन्धन र विशेषगरी राष्ट्रिय स्वतन्त्र पार्टीले प्रदेश संरचना अन्त्य गर्ने आँट गरेमा राप्रपाले संसदमा काँध थाप्ने स्पष्ट पार्नुभयो।
नेता शाहीले मुलुकमा सनातन हिन्दू अधिराज्यको पुनर्स्थापना र राजासहितको प्रजातान्त्रिक शासन व्यवस्थाका लागि पनि संविधान संशोधन आवश्यक रहेको जिकिर गर्नुभयो। उहाँका अनुसार सरकारसँग हाल रहेको १८२ सिटमा राप्रपाका सांसदहरूको समर्थन थपिएमा कुल संख्या १८७ पुग्ने र त्यसले संविधान संशोधनका लागि आवश्यक दुई तिहाई बहुमतको सुनिश्चितता गर्नेछ।
सम्बोधनका क्रममा शाहीले राष्ट्रियता र जनजीविकाका सवालमा राप्रपाले सम्झौता नगर्ने बताउँदै प्रदेश संरचना खारेजीको मुद्दामा सबै दलहरू एकै ठाउँमा उभिनुपर्नेमा जोड दिनुभयो। उहाँले आफ्नो पार्टीले संविधान संशोधनका लागि आवश्यक पर्ने थप पाँच सिट उपलब्ध गराएर भए पनि परिवर्तनका पक्षमा उभिने उद्घोष गर्नुभएको छ।
नेता शाहीले आफ्नो पार्टी सधैँ मुलुकको हित र जनताको भावना अनुरूप अघि बढ्न तयार रहेको बताउँदै प्रदेश संरचना खारेजीको विषयमा सरकारको आधिकारिक धारणा र ठोस कदमको प्रतीक्षा गरिरहेको समेत उल्लेख गर्नुभयो।
प्रतिक्रिया
सम्बन्धित खवर
